أنا شفت بعيني كيف كانت الناس منفّخه بالشوارع، وإحنا ندور عشان ندوّر على اكل داخل الدور اللي هجرها اهلها كنا نشوف بالبيوت ختيارييه ميتين ومنفخين.. حتّى بالجمله أخوي أبو سعيد وهو يدوّر على اكل خبط ببطن واحد مش داير باله ولاّ هو بطنو فاقع .. منفوخ فاقع .. وكمان ببير الزيبق وإحنا مروحين كنا نشوف الجثث.
في هاي الفتره ..رحنا على دار العجوه بطرف اللد .. قعدنا في الكروم هناك .. قعدنا فيهم بيجي شهر ..لا شغل ولا قمح ولا طحين ولا في شي .. كنّا ندور على الدور اللي هاجرت ندور على اكل ونقطف من الخضره المزروعه اللي تركوها .. يوم من الايّام اجت دوريّه إسرائيليّه ..امّي طوّقتنا.. وأجا يهودي وقال بدي اطخهم .. قال له الضابط لا ما تطخهم ان بعرف ابو العبد .. وقال لأبو العبد .. إسمع ممنوع تقعد هون ..إذا إجت دوريّه غيرنا بطخّوكم .. قال له ابو العبد بدنا نرجع على اللد بلدنا ..قال له لا  اللد صار فيها معركه .. مذبحه كبيره بالجامع والجيش هناك اذا رحت بطخوكم روحوا على الرمله ..حضروا حالكم بكرا الصبح ببعتلكم جيش وباجي أنا معهم عشان ياخدوكم على الرمله .. تاني يوم الصبح لمّا جاء الجيش ورحنا على الرمله  وقعدنا بساحة الدير هناك .. كام يوم ورجعنا .. صار يوزعو دور علينا وحطوا  سياج ... حكم عسكري .. ممنوع الواحد يطلع ولا يفوت ..إحنا رحنا لاقينا دار واسعه قعدنا فيها ..

بعدها صاروا يذيعو بالمايكريفونات، كل أهل البلد تنزل على الساحه الفلانيّه بأمر من المحكمه .. رحنا وصرنا  نلملم حالنا ونقعد هناك عشان يعطونا هويّات .. قعدنا من الصّبح لبعد المغرب .. الدنيا كانت صيف وحار ..قعدنا .. العطشان اللي بدّو يشرب مسكين فش مي .. واللي بدّو يوكل فش أكل .. قاعدين طول النهار ..أجو بعد الظهر جنود يهود وصارو يسجلو ، إنتي إبن مين وقدّيش عمرك .... وقالوا إذا كان في ناس بدّهن يزرعو ، يروحو يشوفو شقفة أرض ويزرعوها، .. الأرض مش النا بس الحكومه كانت تعطي لكل واحد كام دونم أرض عشان يزرع .. وكان ييجي الحاكم العسكري يعطينا تصريح عشان نحرث ونزرع .. وين بنك ديسكونت اليوم هذا اللي صار مطعم، هناك كان الحاكم العسكري .. يروح أخوي أبو ابراهيم كل يوم جمعه يجدد وياخذ تصريح عشان نطلع نزرع ونحرث من السبعه الصبح للساعه ستّه تقريبا ، ممنوع الواحد بعد الساعه ستّه  يكون خارج الدار ..اللي بشوفوه بعد الستّه برّه  كانو يطخّوه او يحبسوه ..

جولة في اللد / סיור בעיר לוד (אלְלִד)

مسجد دهمش في اللد / מסגד דהמש בלוד

مسجد دهمش / מסגד דהמש